Consonante aproximante

Una consonante aproximante ye un fonema articuláu por aciu l'aproximamientu de dos órganos d'articulación ensin atayar totalmente la corriente d'aire (como asocede nes oclusives) nin producir estricción con turbulencia oyible (como asocede nes fricatives). Son soníos entemedios ente les vocales y les consonantes obstruyentes, yá que producen un estrechamientu mayor que'l de les vocales pero ensin aportar a tan estrechu como'l que se da nel restu de les consonantes. Les aproximantes crean por tanto un grau de obstrucción menor que les fricatives y naturalmente, les oclusives.

Les aproximantes inclúin les llaterales como [l] (como en labio) y [ʎ] (como na pronunciación antigua de llave) y les semiconsonantes como [j] (familia) y [w] (foyera).